Елордада қарт адамдарға арналған демалыс орталығы ашылды

Осы аптада Есіл ауданында зейнеткерлерге арналған 13 бос уақыт орталығы ашылды. Орталық аудандық ардагерлер кеңесінің және Есіл ауданы әкімі аппаратының қолдауымен құрылған. Ол қалай жұмыс істейді? Бұл туралы елорда әкімдігі ресми сайты тілшісінің материалынан оқыңыз.


Жаңа орталық №78 мектеп-гимназия ауданындағы «Құлагер» ТК тұрғындары үшін ашылды. Ашылу салтанатына Есіл ауданы әкімі аппаратының басшысы Арай Садықов, қалалық ардагерлер кеңесі төрағасының орынбасары Есболат Дүйсенов, Есіл ауданы ардагерлер кеңесінің төрайымы Рысты Атығаева, сондай-ақ көп қабатты үйлердің тұрғындары қатысты. Дәстүрлі түрде ашылу салтанаты қызыл лентаны кесуден басталды.

Мұнда барлығы 200-ден астам зейнеткер тұрады. Олардың барлығы белсенді өмір салтын ұстанады. Серуендейді, немерелерін тәрбиелейді.


«Бұл – біздің ауданда ашылған 13-ші орталық. Мұнда қариялар әңгіме-дүкен құрып, үстел ойындарын ойнап, теледидар көріп, газеттер оқи алады. Демалыс орталығында туған күндерді де бірге атап өтуге болады», – деді Есіл ауданы ардагерлер кеңесінің төрайымы Рысты Атығаева.


Бүгін бір шаңырақтың астында бір ұрпақ жиналып, балалар мен немерелерінің жаңалықтарымен, жетістіктерімен бөлісті.

Зейнеткерлер айтуынша, мұндай демалыс орталықтары қарт адамдарға уақытты жағымды әрі пайдалы өткізуге септігін тигізеді.

Материалдарды қандай да бір жолмен пайдалануға – Нұр-Сұлтан қаласының ресми сайтына белсенді гиперсілтеме болған жағдайда жол беріледі http://astana.gov.kz