Нұр-Сұлтан қаласы №38 мектеп – лицейінде білім ордасының құрылғанына 20 жыл толуы қарсаңында, «Рухани жаңғыру» бағдарламасы аясында қазақтың бас ақыны, кемеңгер ойшылы, ұлы Абайдың 175 жылдық мерейтойына орай «Еркін елдің ер қызы» атты тақырыпта танымдық-тағылымдық мәні зор кездесу кеші өтті, деп хабарлайды елорда әкімдігінің ресми сайты.

Кештің қадірлі қонағы ақын, Қазақстан Жазушылар одағының мүшесі, қалалық, республикалық ақындар мүшәйрасының жеңімпазы, Абайтану ғылыми-танымдық орталығының директоры, Абайтанушы - Алмахан Мұхаметқалиқызы болды.

Кеш қонақтары ақынның балалық шағына саяхаттап, ақындық өнерге келу жолымен таныс болды.  

Айта кетерлігі, ақынның «Жансая» (Семей, 1999 ж.), «Тылсым сыры» (2002 ж.), «Жыр-ғұмыр» (Семей: Тенгри, 2006 ж.) атты өлең жинақтары, сонымен қатар «Шәкәрім», «Қан мен тек», «Құрсақсыз ана» поэмалары ел арасында кеңінен танымал.

Әдеби танымдық кеште оқушылар ақынның шығармашылығымен танысып, оның өлеңдерін оқыды.

Алмахан Мұхаметқалиқызы Абай шығармашылығын насихаттап жүргендердің бірі. Саналы ғұмырының 18 жылын Семейдегі Абай мұражайында қызмет етуге арнаған жан.

«Абай  есімі тек әдебиетке ғана қатысты емес, Абай арқылы жаратылыстану, математика, химия, физика  пәндерін де оқытуға болады»,  -  деді ол оқушылармен кездесуінде.

Әдеби-танымдық кеште Ұлы ақын Абайдың «Өлең –сөздің патшасы, сөз сарасы», «Ойға түстім, ой салдым», «Қалың елім , қазағым, қайран жұртым» және т.б. өлеңдері оқылды.