Нұр-Сұлтан әкімі инвестициялық кеңесте қандай жобалар қолдау тапқанын айтты

Мемлекет басшысының тапсырмасына сәйкес инвесторлар үшін барлық жағдай жасалып, әкімшілік кедергілер алынып тасталуда. Бұл туралы Нұр-Сұлтан қаласының әкімі Алтай Көлгінов өзінің "Инстаграм" парақшасында жазды, деп хабарлайды елорда әкімдігінің ресми сайты.

"Қала мен тұрғындар қажет ететін нысандардың құрылысына, жаңа жұмыс орындарын құруға жеке инвесторларды тартамыз. Бүгін өңірлік инвестициялық кеңесте бірқатар әлеуметтік жобалар қолдау тапты. Олардың қатарына медициналық қолғаптар шығаратын зауыт, мектептер, балабақшалар, медициналық орталық, "Триатлон академия" оқу-спорт кешенін салу жатады.

Сонымен бірге автоклавты газоблокты және резеңке үгіндісін (тақташа, жұмсақ жабынқыш, жол кедергілері) өндіретін зауыттардың құрылысын қолдады. Өндірілетін өнімді құрылыс секторында, қаланы, аула аумақтарын, қоғамдық кеңістіктерді абаттандыру кезінде қолдануға болады.

Мемлекет басшысының тапсырмасына сәйкес инвесторлар үшін барлық жағдайды жасап, әкімшілік кедергілерді алып тастаймыз. Дегенмен, инвесторлар барлық құжаттарды алған кезде жобаларды мерзімінде іске асыруға кірісуі қажет. Құрылыс барысын тоқсан сайын салыстырып, тексеріп отырамыз", - деп жазды Алтай Көлгінов.