Елордада қазақстандық және шетелдік спортшылардың қатысуымен кәсіпқой бокс кеші өтті.

Спорттық шараның басты кездесуінде қазақстандық спортшы Айдос Ербосынұлы WBC, WBO, WBA чемпиондық титулдарын қорғап, осы уақытқа дейін мансабында бірде-бір рет жеңіліс көрмеген ганалық боксшы Иссах Самирді жеңді.

«Сондай-ақ біздің отандастарымыз Бек Нұрмағанбетов, Евгений Павлов, Данила Семенов және Бекзат Нұрдәулетов қарсыластарын айқын басымдықпен жеңіп, Тәуелсіздік күні қазақстандықтарға жеңіс сыйлады», - деп атап өтті елордалық дене шынықтыру және спорт басқармасы.

Спорттық шара «ХАБАР» телеарнасында көрсетілді. Кәсіпқой бокс рингінде барлық санитарлық талаптар сақталып, жекпе-жектер көрерменсіз өтті.

Айта кету керек, кәсіпқой бокс кешін Suleimen Promotions промоутерлік компаниясы қала әкімшілігінің қолдауымен ұйымдастырды.