Бүгін елміздің барлық мектептерінде ең жауапты, ең толғанысты сәт – Ұлттық бірыңғай тест тапсыру басталды. Республика бойынша 56 тестілеу орталығында 25756 түлек бақ сынайды. 

Елордада ҰБТ үш университет базасында өтуде. Олар: Л.Н.Гумилев атындағы Еуразия Ұлттық университеті, С.Сейфуллин атындағы Қазақ агротехникалық университеті және Қазақ гуманитарлық заң университеті. Осы университеттер базасында бірінші күні 2000-ға тарта мектеп біруші тест тапсыруға отырды. Тест тапсыру 3,5,7 маусым күндері өтеді. 

Тұтастай алғанда, Астанада тестке 82 жалпы білім беретін мектептің түлектері қатысады. Қалалық Білім басқармасының мәліметі бойынша, ол – 3686 адам. Мектеп бітірушілердің жалпы санының 3292-і ҰБТ тапсыруға өтініш берді. Онбірінші сынып оқушылары арасында ҰБТ тапсырудан босатылғандар бар. Олар – халықаралық олимиадалар мен ғылыми жобалардың  жеңімпаздары, шетелдерде оқығысы немесе колледждерге түскісі келетін балалар. 

 ҚР Білім және ғылым министрлігі ҰБТ-да биылғы жылы еш өзгеріс болмайтынын мәлімдеді. ҰБТ тестілік тапсырмасы базасында 160 мыңнан аса тест сұрақтары бар.  Олардың  20 900-і биылғы жылы салынған. Олардың 3000-ы бір тапсырма нұсқасы енгізілген математикадан логикалық сипаттағы сұрақ. Ал, Қазақстан тарихы пәні бойынша ҚР БҒМ Мемлекет тарихы институты тәуелсіз сараптама жүргізді.  

Еске салайық, 2013 жылдың 3-і мен 15 маусым аралығында республикада Ұлттық бірыңғай тест (ҰБТ) өткізіледі. Оған республика бойынша 99 565 мектеп бітіруші қатысуы жоспарланған.  Бұл жалпы санның 69 %-ы. Соның ішінде: 68 316 қазақ мектептерінде, 31 249-ы орыс мектептерінде оқитын түлектер.