Астанада кеше теннистен ҚР Президенті Кубогы аяқталды. Өкінішке орай, қазақстандық теннисшілер ақтық сында жеңіліс тапты. Бұл туралы astana.kz сайтына Астана қаласының дене шынықтыру, туризм және спорт басқармасынан хабарлады.

Ерлер арасындағы жеке кездесуде бұған дейін командаласы Андрей Голубевтен басым түскен Михаил Кукушкин әлемнің 97-ші ракеткасы, Израиль спортшысы Дуди Селамен кездесті. Матчқа ауа райы кедергі жасады. Финалдық кездесулер елордалық «Дәулет» СК жабық кортына ауыстырылды.

«Бірінші сетте 7:5 есебімен жеңіске жеткен Михаил Кукушкин, келесі сетте 2:6 есебімен ұтылып қалды. Үшінші сеттің басында қазақстандықтың белі ауырып, оған медициналық көмек көрсетілді. Бұл ретте Кукушкин 6:7 (6:8) есебімен жеңілді. Матч 2 сағат 59 минутқа жалғасты», - деп хабарлады ведомство.

Жеңімпаз атанған Селе $18,000 сыйақыға ие болып, АТР рейтингінде 110 ұпай еншіледі.

Қазақстандықтар жұптық кездесуде де есе жіберді. Финалда Андрей Голубев пен Михаил Кукушкин тегеурінді күресте итальяндық жұп Риккардо Гедин мен Клаудио Грассиге жол берді. Матчтың нәтижесі - 6:3, 3:6, 10:8. Бұған дейін жартылай финалда отандық теннисшілер Ти Чен (Тайпей)/Янг-Ку Лим (Корея) дуэтінен 7:6, 3:6, 10:7 есебімен басым түскен болатын.

Әйелдер арасында жұптық кездесуде турнирде Украина спортшылары - апалы-сіңлі Киченоктар жеңімпаз атанды. Олар ақтық сында ресейлік жұп - Нина Братчикова мен Валерия Соловьевадан айласын асыра алды, 6:2,6:2.

Надежда Киченок сондай-ақ, турнирде әйелдер арасындағы жеке кездесулерде де топ жарды. Шешуші кездесуде Украина теннисшісі 6:4, 7:5 есебімен Президент Кубогының былтырғы жеңімпазы португалиялық Марию Жоао Кохлерді жеңді.

Еске салайық, елордалық турнирдің жүлде қоры 225 мың долларды құрады. Додаға әлемнің 25 елінің спортшылары қатысты.