Бүгін Астана қаласында «Нашақорлық және есірткі саудасына қарсы халықаралық күрес күніне» орайластырылған 2007-2008 жж. туған жасөспірімдер арасында екі күнге созылған футбол турнирі мәресіне жетті, деп хабарлайды Астана қаласы әкімдігінің ресми сайты.

Турнир «Астана – есірткісіз қала» атты ұранмен өтті. Жарысқа қаламыздың Олимпиадалық резервтегі мамандандырылған балалар-жасөспірімдер мектебі, «Астана» футбол орталығы және жекеменшік спорт мектептерінен жалпы саны 120 баланы құрайтын сегіз команда қатысты.

Іс-шара Астана қаласы әкімдігінің ІІД Есірткі бизнесіне қарсы күрес басқармасы, ІІД Арнайы дайындық басқармасы, Астана қаласының Мәдениет және спорт басқармасы қолдауымен өтті.

«Турнир 2007-2008 жж. туған жасөспірімдер арасында өтуде. Шара «Астана – есірткісіз қала» акциясы аясында өтуде, оған қаламыз бойынша сегіз команда қатысты», – деді №8 Олимпиадалық резервтегі мамандандырылған балалар-жасөспірімдер спорт мектебі директорының орынбасары Дияс Үкімет.

Ойынның финалында «Астана» футбол орталығының 2007 жылы және 2008 жылы туған жасөспірімдер командалары кездесіп, 2008 жылы туған жасөспірімдер жеңіске жетті. Ал, жартылай финалда № 8 Олимпиадалық резервтегі мамандандырылған балалар-жасөспірімдер спорт мектебінің 2007 жылы және 2008 жылы туған жасөспірімдер командасы кездесіп, біріншілері жеңіске жетті.

Жеңімпаздарға дипломдар мен медальдар және бағалы сыйлықтар табыс етілді.