Елордалық 9 мектеп «Ақберен» республикалық байқауына іріктеуге қатысты

Астанада 5-10 сынып оқушылары арасында өтетін «Ақберен» республикалық байқауына  іріктеу кезеңі өткізілді. Алты аталым (ақындық, шешендік шеберлігі, шығарма, ұлттық аспапта ойнау, ақындар айтысы) бойынша ұйымдастырылған іріктеу турына №15, №40, №49, №53, №57, №66, №67, №69, №38 мектептерінен 50 оқушыдан тұратын 9 команда қатысты. Бұл туралы astana.kz сайтына «Астана дарыны» өңірлік ғылыми-практикалық орталығынан хабарлады.

Байқаудың республикалық кезеңіне жеке аталымдар бойынша ең көп балл жинаған №40, №67,№69 мектептер өтті. Қазылар алқасының шешімімен «Ақберен» республикалық байқауында шешендік өнер аталымында №40 орта мектебінің 8-сынып оқушысы Еманғалиева Камила, көркемсөз аталымында №40 ОМ 10-сынып оқушысы Жақып Мадияр, ақындар мүшәйрасында №40 ОМ 8-сынып оқушысы Әнкей Елдос, ұлттық аспапта ойнау аталымында №40 ОМ 10-сынып оқушысы Бижанов Мади, шығарма жазуда №67 гимназияның 10-сынып оқушысы Аббас Жансая, ақындар айтысында №69 МГ 9-сынып оқушысы Әлбосын Таңнұр Астананың намысын қорғайтын болады.

Айта кетейік, «Ақберен» байқауының республикалық кезеңі гуманитарлық-эстетикалық ғылымдар саласында дарынды балаларды айқындау мақсатында мамыр айында 5-10 сынып оқушыларының арасында ұйымдастырылады.